Les mots surlignés font l'objet d'une note
1Monsieur de Gordes, m’estant acheminé en ceste ville à lassemblée des estatz de mon
2gouvernement pour resouldre avec eulx des moyens qu’ilz me peuvent donner pour lexecution
3de la vollunté du roy, je les ay trouvey de si bonne vollunté que sans plus tarder je me
4suis resolu de me mectre aux champs et de commencer dès le premier jours de camper
5avec ce que j’ay de forces, actendant le reste de ce que sa majesté m’en a ordonné, quy me faict
6vous prier de donner ordre promptement que les compagnies que le païs de Daulphiné
7me doibt fournir soint toutes prestes pour marcher quant je le vous manderay, quy sera
8bien tost et incontinent après que toute lartillerie qui m’est necessaire sera preste, comme j’espère
9qu’elle sera dans peu de jours. Venant icy, les ennemis s’estoient mis en campaigne, feignans
10de voulloir combatre. Mais m’estant presenté et entré bien avant dans leurs limites
11avec II m[ille] bons harquebuziers pour les combatre, ilz se seroient retirez de nuict et depuis en ça
12la campaigne m’est demeurée. S’ils en veullent venir là d’oresnavant, je leur feray beau jeu.
13Il y a si longtemps que je n’ay eu de voz nouvelles qu’il m’est advis que vous m’avez du
14tout oublié. Quant il vous plaira de m’en faire part, je m’en revencheray à toutes les
15occasions qui s’offriront dadeça, me recommandant en cest endroict de bien bon cœur à
16votre bonne grace. Priant Dieu vous donner, monsieur de Gordes, en bonne santé
17heureuse et longue vie. De Monpellier, ce XVIIIe janvier 1573.
18Il y a une lettre cy enclose que j’esriptz à monsieur
19de Maugiron que je vous prie luy faire tenir affin
20de faire tenir sa campagnie preste.
21Votre plus affectionné, parfaict et asseuré amy
22H de Montmorancy